ნახევრადუდაბნო და ტყე, წყნარი და მშვიდი, ერთი შეხედვით მიძინებული დედამიწა, მაგრამ ამავდროულად სიცოცხლით სავსე, ულამაზესი ხედებით, ბუნების ძეგლებით, ფლორისა და ფაუნის უნიკალური წარმომადგენლებით მდიდარი ტერიტორია – ეს ვაშლოვანია. ვაშლოვანის დაცული ტერიტორიები საქართველოს უკიდურეს სამხრეთაღმოსავლეთ ნაწილში, კახეთში მდებარეობს. ის 1935 წელს ნაკრძალის სახით ქართველი მეცნიერების, ნიკო კეცხოველისა და ვასილ გულისაშვილის ინიციატივით დაარსდა. 2003 წლიდან კი, დაცული ტერიტორიის გაფართოების მიზნით, ნაკრძალს ეროვნული პარკიც შეემეტა, რომლის ფარგლებშიც მოექცა სამი ბუნების ძეგლი – ალაზნის ჭალები („კაკლის ყურე“), არწივის ხეობა და „ტახტი-ტეფას“ ტალახის ვულკანები, საერთო ფართობმა კი 35 067,5 ჰექტარი შეადგინა.
ვაშლოვანის დაცული ტერიტორიები ერთადერთია საქართველოში, და ერთ-ერთია ევროპის 30 ქვეყნის, მხოლოდ 100 მდე დაცულ ტერიტორიას შორის, რომელსაც მინიჭებული აქვს ევროპული დიპლომის სტატუსი უნიკალური ბიომრავალფეროვნების, გამორჩეული ლანდშაფტების, ეკოსისტემებისა და მცენარეთა და ცხოველთა მდიდარი მრავალფეროვნების გამო.
